هیله

دافغان ښوځوانانو د ملي ټولني لمړنۍ، خپلواكه ،ادبي ،كلتوري او فرهنګي خپرونه


	ولي داسي وشي ؟ ولي داسي وشي ؟ دافغانستان داسلامی جمهوري دولت محترم جمهور ريس ښاغلي حامد کرزي صاحب ته ديو افغان او خوا خوږي ورور په صفت دا څو خبرې کول غواړم. عزتمنده! بس دی شمالي ټلوالي په ځانګړي ډول پنجشيريانو در باندي ډېرې ملنډې ووهلي دټولو افغانانو او په ځانګړي ډول دپښتنو هغه افغاني اوپښتني حيثيت او غرور يې درباندي له خاورو سره خاورې کړ، دخپلو شخصي ،سمتي او ګوندي ګټو د ساتلو لپاره دي کله يو اوکله بل په څنګ کې ناست وي او تا ديوي نانزکي په ډول لوبوي ، خپل ساعت تيری درباندي کوي ، خپلو موخو او اهدافو ته درباندي خپل ځانونه او ټلواله رسوي ، چې يوه ښه بيلګه يې د جمهوري رياست دمرستيالي لپاره يو ځل د احمدضيا (مسعود) او بيا د جنرال فهيم نومول او په ټاکنو کې ستا ملاتړ کول ؤ چې البته هغه هم دخپلو ګټو لپاره ؤ او بل د اوسني دولت د نيمي کابيني شتون اود نورو غټو دولتي پوستونو اشغال دی چې دهمدې ډلي لخوا دولت ته ورپيژندل شوي او ستا خوا خواږي دي او يواځي دوی دي چې په افغان دولت کې دکار کولو حق او وړتيا لري. نودغه نور افغانان درته هسي ناپوه او د پرديو غلامان ښکاري او په خپل دولت کې کار کول ورته خوند نه ورکوي اوکه د افغان په نامه باندي خپلوسرونو قرباني کولو ته نه دي حاضر. دنورو به څه نه درته وايم خويواځي په دغو دريو نفروبه يوڅه رڼا واچوم. لومړی محترم ډاکتر عبدالله ( عبدالله) چې ستا د دولت غړی او دبهرنيو چارو وزيرؤ هغه وخت ستا دولت قانوني ، دولس دغوښتنو سره سم او په نړيوالو سياسي او فرهنګي معيارونو يو برابر دولت ؤ ، اوده ديو وزير په صفت دا حق ځان ته ورکړي ؤ چي د دولت له دري ګونو قواوو او د افغان ولس له خوښي څخه پرته بهرنيانو په خاص ډول امريکايانو ته په افغانستان کي دتل پاته کيدو لاس ليکونه ور وکړي، خو اوس چې يې ستا د دولت غړيتوب له لاسه ورکړ ترهمدي دولت بل خراب دولت د ده په اند دځمکي پر مخ نه ليدل کيږي ،سره له دې چې (فهيم ) او ځيني نور ځوانان يې لا هم ستا په څنګ کې ناست دي خو هغوی ته دا نه وايې چې تاسو دغه پوستونه خالي کړي او دهمدي دولت په ضد کار وکړی ځکه دوی خو دواړه لاسونه په يو ځل په خوله ننباسي او په دې کې ډېرې ګټې دي. دوهم به په ( امرالله صالح ) باندي خبري وکړم هغه چې کله ستا د دولت د خاد( امنيت ) دعمومي رياست دريس په توګه کار کاؤ او ستا د دولت له فعاله غړو څخه شميرل کيدو او يقيناَ چې د دولت په ګټه يې ډير کارونه هم کول هلته ستا دولت قانوني ، انتخابي ، او په نړۍ کې يو پيژندل شوی اومنل شوی دولت ؤ ، خو کله چې دی په خپله دنده کې پاته راغلی او د ( آمن اوسولي دجرګي ) په خيمه باندي د افغان دولت دمخالفينوله لوري حمله وشوه او دهمدې حملي مخنيوی د ده دنده وه او دی يې په سرته رسيدو کې پاته راغی مخنيوی خو څه چې په دې هکله يې لاهيڅ معلومات هم نه درلودل ، نو دهمدې نيمګړتيا په سبب ده وغوښتل چې په تا باندي ځان ګران کړي او خپل نازونه درباندي وکړی نو استعفايې درته وړاندي کړه اوهغه وخت زه نه يم خبرته په کومو سوچونو کې تللی وي د ده استعفادي ومنله چې په نتيجه کې يې نوموړی له دندي څځه ګوښه کړل شو، بس له همغي ورځي ستا دولت د ده په خوله د تروريستانو ملاتړی دولت وبلل شو او دسولي غوښتل او له مخالف لوري سره خبرې کول چې دافغانستان د دېرش ميلونه وګړو غوښتنه وه او غواړي يې ، ولي صالح صاحب له هغي ورځي راهسي په بل خره سپر شويدی او له مخالفينو سره سوله کول يو غير قانوني او دافغانستان د اساسي قانون په ضد يو عمل بولي. دريم به راشو په محترم معنوي صاحب به لږ خبرې سره وکړو چې هغه ته تر ډيري اندازي ديني او اسلامي معلومات هم شته ، دمسلمان حق ،د يو انسان انساني حيثت ته دسپکاوي او په قيامت کې دهغي دبديل په هکله هم پوره معلومات لري اودا لا بله چې په کابل کې دجامع مسجد خطيب هم دی او په سلګونو مقتديان ورپسي اقتدا هم کوي دی لکه دهندي فلم هيرو کله په يوه او کله په بل رنګ جامو کې مسجد ته راځي او له ځانه يې د( فيشن ) او ورځني موډونو د اعلان بورډ جوړ کړيدی. تا هغه ته د افغانستان د ټاکنو د خپلواک کميسون د ريس دنده د همدي لپاره ور وسپارله چې نوموړی دخلکو درايو درناوی وکړي او خوندي يې وساتي خو ده برسيره په خوندي نه ساتلو د هغوی سپکاوی لا هم وکړ، د افغانستان د ديرش ميلونه وګړو په ثابت او منل شوي حق چې ( رايه ) ورکول او ولسي جرګي ته ديو سالم شخص ټاکل ؤ څه لوبي ونکړي او پارلمان ته يې څنګه خلک وليږل او دا نزدي يو کال کيږي چې د افغانستان په پارلمان کې څه نه دي شوي او د نړۍ ټولي رسنۍ ورباندي څه خبري نکوي اوبل د ډېری وکيلانو افغاني عزت او حيثيت دهمدې معنوي له لاسه له منځه ولاړ ، دا که خپله وکيلان په دې نه پوهيږي دا دهغوی خپله نيمګړتيا او ګناه ده ، ده دخپلو شومو اهدافو دتر لاسه کولو لپاره له ولسي جرګي هم خپله ټلواله جوړه کړه کله يو وکيل په حق وبولي هغه بل پسي پايڅې راپورته کړي او کله بل په حق وبولي او هغه پسي واخلي،.چې په نتيجه کې يې آغلي ( سيمين بارکزۍ ) دا دی نهه ورځي کيږي چې دنه خوړلو اعتصاب يې کړيدی او دا وايې چې زه خو يوه عاجزه ښځه وم او ما خو کومه درغلي هم نه ده کړي ولي زه د ټاکنو دخپلواک کميسون د چارواکو تر نظر ډيره کمزوري ورغلم او دا دی له ولسي جرګي يې په غير قانوني ډول و ايستلم او له دې سره شته روغتيايې ټيم وايې چې دنوموړي روغتيايې حالت ډير خراب دی او همدا اوس نوموړي د رسنيو له لاري خپل وصيت ( چې زما دمرګ مسؤلين خپله کرزی او دټاکنو د کميسون ريس معنوي دي ) هم خپلو هغو خلکو ته کوم چې دې ته يې رايه ورکړي وه واو راؤ. نو کرزی لا لا تا که نور نشوای کولای د همغي ځانګړي محکمي پريکړه خو به دي منلي وای دهغي ملاتړ خو به دې کړی وای يو خوا اسلام ، قضا او محکمي ته درناوی شوی وای بله خوا به دهمدي جنجالونو مخه نيول شوي وای ځکه د افغانستان ولس يو مسلمان ولس دی د اسلام او قضا ډير ملاتړي دي حتماَ يې ستا پلوي هم کوله، ته راغلي يو ځل دي بيا معنوي ته واک ورکړ اوهغه څه د ولس اصلي استاځي چي په پارلمان کې پاته ؤ هغه دي هم له ولسي جرګي ورباندي را وايستل او ټول يې خپل پلويان او د ولس د ارادو مخالف خلک يې بيرته هلته بريالي وبلل او پارلمان ته د تللو لاره يې ور ته هواره کړه. يو ځلي وړاندي هم يو افغان ورور درته ويلي ؤ چې په افغانستان کې خو څه ( قحط الرجال ) نه دی چې يواځي له يو ولايت څخه به خلک په دندو ګمارل کيږي ټول وزيران او ريسان به د يوه ولايت وي او نه د دولت څوکۍ دچا ميراث ګرځيدلای شي. نو په اخير کې درته وايم د آغلي سيمين بارکزۍ غم که په هر ډول وي و يې خوره او له هغه وروسته بيا داسي کارونه مه کوه چې دنورو دخاصو ګټو لپاره د افغان ولس دا ځوريدلي وګړي نورهم وځوريږي او ولي داسي وشي؟ عبدالباري ( رمان ) لښکرګاه ، هلمند 　　 \|+\| لیکل سوی په واسطه دافغان ښوځوانانو ملي ټولنه در <-PostDate- \|


	۱۶ ولسی وګړی ووزل سول په هلمندكې د وسلوال بريد په ترڅ كې ۱۶تنه ولسي وگړي ټپيان اويوماشوم ووژل شو د هلمند د والي وياند محمد داود احمدي وايي چې د پنجشنبې په روځ سهارد وسلوالوطالبانولخوا وسلوال بريد د گرشك ولسوالى د حوض خشك په سيمه كې له هرات څخه په راتلونكي ۳۰۳بس موټرترسره شوى چې په پايله كې يې اته ښځې،څلورسړي اوڅلورماشومان ټپيان شوي اويوماشوم وژل شوى دى. دده په وينا چې د پيښې ټپيان د گرشك ولسوالى ځايي روغتون ته ليږدول شوي دي. خووسلوالوطالبانوتردې مهاله په دې اړه څه نه دي ويلي. \|+\| لیکل سوی په واسطه دافغان ښوځوانانو ملي ټولنه در <-PostDate- \|


	د افغانستان او هند د ستراتیژیکې همکارۍ تړون نوی متن د افغانستان او هند د ستراتیژیکې همکارۍ تړون متن د افغانستان اسلامي جمهوریت او د هند جمهوریت، چې تر دې وروسته د "د دواړو خواوو" په نامه یاديږي، د دواړو هيوادونو، ترمنځ دوستانه اړیکو ته په پام سره چې تاریخي فرهنګي ريښې لري او د زمانې له ازمايښت په بریالیتوب راوتلې. د افغانستان دشاهي حکومت او دهند دهغه وخت د حکومت د ۱۳۲۸ لمریز کال د جدي د ۱۴ نېټې (چې د ۱۹۵۰ عیسوي کال د جنوري له ۴ سره برابره وه) د دوستۍ پر نه هیریدونکي اهمیت او تر هغه نه پر وروسته تړونونو او ګډو اعلامیو ټینګار؛ د ګډو ګټو د خوندیتوب،لپاره د دواړو خواوو د تاریخي اړیکو دټينګښت او لا ودې؛ د دواوو خواوو ترمنځ ،د ديپلوماتیکو اړیکو له پیله ،خوراپانګمن دود دستور ته په پام سره هلې ځلې؛ په دې باور چې د دوه اړخيزو اړیکو هر اړخیزه وده به، د دواړو هېوادونو او سیمې د پرمختګ او بري بشپړلامل شي؛ د دواړو هيوادونو د اړیکو د پام وړ پراختياته په پام سره او دهند د جمهوريت له بې پایه او دزړه له کومې مرستو نه په مننې سره چي، په تيرو لسو کالنو کې یې له افغانستان سره کړي دي؛ د دوه اړخیزو او څو بعدي اړيکو اوږد مهاله تعهد ته د رسیدو او دغه راز په راتلونکې کلونو کې د بېلابېلو لکه سياسي، اقتصادي،سوداګریزو، علمي،تکنالوژۍ، فرهنګي او نورو برخو د چټکې ودې په هیله؛ د ګډو ارمانونو ،سولې،ډيموکراسي،د قانون د لاسبري،دزورزياتي مخنوي، دبشري حقوقو او بنسټیزو ازادیو سره د لیوالتیا په تایید؛ نړیوالو موازینو ،قوانینو او همدغه راز د ملګرو ملتونو په منشور کې د راغلو اهدافو او اصولو له مخې پر خپلو تعهداتو بیا ټینګار؛ د دغه سند له مخې د ګډو ستراتيژیکو همکاریو مواد په لاندې ډول اعلانیږي: عمومی اصول ۱- دا تړون د دواړو هېوادونو تر منځ،څو بعدیزه اړیکي، د دواړو خواوو تر منځ د متقابل تفاهم او د اوږد مهاله اعتماد پر بنسټ،هم په دوه اړخیزو او هم په نړیواله برخو کې لا لوړو کچو ته وده ورکوي؛ ۲- د دواړوو خوا تر منځ ، د ستراتیژیکو همکاریو تړون ،د حاکمیت،برابرۍ،د هېوادونو د خاورې بشپړتیا،خپلواکۍ، د یو بیل په کورنیو چارو کې د نه لاس وهنې، دیو بل د ګټو دمتقابل درناوۍ د اصولو پر بنسټ ولاړ دی. ۳-د دواړو خواوو د ستراتيژیکو همکاریو تړون، دبل هيڅ هېواد او د کومې بلې ډلې هېوادونو پر ضد نه دی. سياسي او امنيتي همکارۍ ۱-دواړه خواوې، د سیاسي همکاري د اړیکو د دود له مخې،په دې برخه کې ،د سیاسي او بهرنیو مشورو لپاره، د يوه منظم ،دوه اړخیزه سياسي ميکانيېزم پر جوړول موافقه کوي.سياسي مشورې به هر کال یو وار د دواړو هېوادونو د بهرنیو چارو د وزیرانو په لارښوونه تر سره کيږي.او خبرې اترې به هم هر کال لږ ترلږه يو کال د هېوادونو د مشرانو په کچه وي. ۲-دواړه خواوی موافقه کوي، چي ، په ملګروملتونو، په نورو نړيوالو ، سيميزو او څو اړخيزو ټولنو کې دې ، یو له بل سره مشوره او همکاري کوي. دغه همکارۍ به په دغو ټولنو کې د غوره پریکړو او د دواړو هېوادونو دګټو په پام کې وي؛ په ملګرو ملتو او نورو څو اړخیزو ټولنو کې به مرسته په دغو برخو کې وي: الف) د نړیوالو او سیمه ایزو اساسي او بنستيزو مسایلو د وړاندې کولو لپاره ګډ نوښتونه. ب) د ملګروملتونو په ټولنه کي له اصلاحاتو ،دهغې شورای د پراخيدو او په هغې شورای کې دهند د جمهوریت د دایمي، غړيتوب د ترلاسه کولو نه ملاتړ. ۳ - دواړو خواوې، موافقه کوي چي، د ملي امنيت په اړه به ستراتيژيکي خبرې اترې پيلوي .ددغو خبرو مشري به د دواړو هېوادونو د ملي امنيت ادارې کوي. دغه خبرې به د سیمه ایز امنیت او سولې لپاره د منظمو مشورو او ګډو هلوځلو د اهدافو لپاره وي. ۴ – امنیتي همکاري به ، د دواړو خواوو له خوا د نړيوالې ترهګرۍ پر وړاندې مبارزه ،له وړاندي پلان شويو جرايمو ، د غيرقانوني مخدره توکو د قاچاق ،د تورو پيسو سپينول او داسي نورو جرايمو په برخه کي د متقابلو همکاريو له مخې کيږي. ۵ – دهند لوری،د متقابلې تفاهم له مخې ژمن دی چې د افغان امنيتي ځواکونو د روزنې او دهغو د ظرفيت په لوړوالي کي به له افغان لوري سره همکاري وکړي. اقتصادي او سوداګریزی همکارۍ ١- دواړه خواوې، د سوداګریزو، اقتصادي ،علمي او ټکنالوژي برخو دپیاوړتيا په برخه کې همکاریو ته هوډمن دي، دغه راز د سوداګریزو، اقتصادي اړیکو ودې ته په پام سره ،د سوداګریزو او صنعتي چارو د نورو استازو سره د مرستې کولو هوډ لري. ۲ – دواړه خواوې،د افغانستان د ښې او غوره ودې او د دواړوو هېوادونو،یو بل ته د خپلمنځي پورتننیو اقتصادي اړتياوو ،له مخې تعهد کوي ،چې ددغه شان برخو:کرنې،د کلیو پراختيا،د معدنونو د ایستلو، صنعت، انرژۍ،معلوماتي تکنالوژۍ،مخابراتو ترانسپورت ،دهوايي ملکي ترانسپورت په ګډون، او نورو برخو په وده کي چې دواړو خواوې پرې موافقه لري،اقدام وکړي. ۳ - دواړه خواوې موافقه کوي، چې د سوداګرۍ د پراختيا او پانګه اچوني په برخه کي د مناسبې فضا د رامنځ ته کیدو لپاره ګټور ګامونه پورته کوي،دا ګامونه کولای شي دغه ټکي ولري : الف) له پانګي اچوني سره د ملاتړ زیاتوالی.‎ ب) په ګمرکي او هغه پورې نورو اړوندو برخو کې داسانتياو برابرول ، د غیر تعرفي خنډونو د منځه وړلو لپاره د هڅو زیاتول او د تعرفوي خنډونو کرار کرار کمول؛ ج) د سوداګریزو اړیکو د لا ښې هڅونې لپاره د هوايي وړلو راوړلو د رامنځ ته کولو په برخه کې همکاري. د) په بانکدارۍ او مالي برخو کې مرسته، او د بیمې او پورونو په اخیستوکې د اسانتیاوو برابرول. ه) په نړيوالو سوداګریز، اقتصادي ا و مالي سازمانونو کې د همکارۍ او همغږۍ زیاتوالي. ۴- دواړه خواوې ، به دیو اوږد مهاله لرلید له مخې، د دوه اړخيزو پایدارو تجارتي اقتصادي اړیکو پراختيا او ودې ته درسیدو لپاره داسې اغیزمن او ګټور میکانیزمونه جوړوي چې د افغاني او هندي ټولنو ترمنځ اړيکي تامین شي. ځانګړو کړو وړو کې به دغه ټکي شامل وي: الف) د دواړو هېوادونو د سوداګرۍ او اقتصاد د ودې او فرهنګي همکاريو لپاره،د سیمه ایزو او ولایتي اړیکو هڅونه؛ ب) په دواړوو هېوادونو کې اړوندو ټولنو ته ،له درېیمو هېوادونو سره د سیمه ایزې سوداګرۍ دګډو امکاناتو دنظم بښلو د همکارۍ د صلاحیت ورکول ؛ ج) د کیفیت دتضمین،د ستندر جوړولو او نویو تکنالوژۍ له موسساتو سره د همکارۍ له لارې ، په نړیوالو بازارونو کي د رقابت په موخه د دواړو هېوادونو د سوداګريزو کالیو د کيفيت لوړول ؛ د) د دواړو هيوادونو د سوداګريزو او صنایعو د خونو ترمنځ لا ټینګه همکاري. ۵ – دواړه خواوې، ددې خبرې په پام سره چې ،سيمه ايز اقتصاد د هر هېواد د ارامۍ او ابادۍ يو ژوند بښونکي اصل دی،موافقه کوي،چې هم په دوه اړخيزه او هم د سیمه ایزو ټولنو له لارې ،د سیمه ایزو اقتصادي همکاريو د ودې،په چاروکي یو له بل سره مرستې وکړي. اقتصادي ،سیمه ایزې همکارۍ باید: الف) افغانستان ته باید، د تجارت ، ترانسپورت ،د انرژۍ د لېږدولو دداسې يو نوی راپیداکیدونکي مرکز په توګه پام وشي، چې منځني او سهيلي اسيا سره نښلوي او له دغه هيواد ته د يوه آزاد او هر اړخیزه ترانسپورت او ترانزیتي کړیو د درلودلو لاره آواروي. ب) پر سيمه ايزو بنسټيزو پروژو باید تمرکز وکړي. ج) د سهیلۍ اسیا او نړیوال اقتصاد ته د افغانستان داقتصاد ورګډول او خپلمنځي متقابلو ګټو ته په پام د آزادو بازارونو دپرانستلو له لارې ، د افغانستان او هند تولیدي کالیو ته آسانتیاوې برابرې کړي. د) سیمه ایزې همکاري،د سارک د سازمان له لارې ،چې دواړه هېوادونه دهغه غړيتوب لري،لا پياوړې کړي. روزنه او ظرفیت جوړونه ۱- د هند هېواد، د افغانستان د اوږد مهالې او پایدارې ودې د تامین،او دهند د اوسنیو له پیرزوینو ډکو مرستو له مخې ځان هوډمن ګڼي، چې د افغانستان د ودې او ظرفیت جوړونې لپاره خپلو مرستو ته دوام ورکړي. الف) دغه مرستې به له نورو برخو سربیره چې د افغانستان د لومړيتوبونو ښکارندوي کوي، دکرنې،معادونو او روغتیا په برخه کې متمرکزې وي؛ او ب) د هند هېواد،دغه راز ځان دهغو پراختيايي کوچنیو پروژو ،په وده کې هوډمن بولي چې په لرو پرتو او کلیوالو سیمو کې پرتې دي. ۲- دواړه خواوو موافقه وکړه چې د خپلو حکومتونو تر منځ خپل بنستيزې اړیکي ،د وزارتونو او نورو ارګانونو د هڅونې له لارې پیل کړي.دهند پلو به ،د خپل بنستيز،اداري،سیاسي او اقتصادي سیستم تجربې ،دیوې داسې مرجع په توګه چې افغانستان کولای شي هغه مطالعه او له هغو نه د خپلو اړتياوو او واقعیتونو لپاره ګټه واخلي،دوی ته ورکړي. ۳- د هندي خوا به،د افغانستان لپاره د خپلو کلنیو تحصیلي بورسونو د تګلارې له مخې ،چې په خورا بریالیتوب سره پرمخ تللې او په افغانستان کې د لوړو زده کړو د ستراتيژۍ له مخې پراخ ملاتړ لري،په هند کې د ښوونې پراختيا او روزنې ته د ICCR او ITECدبورسونو او د څو اړخيزه تامین شويو پروګرامونو له لارې دوام ورکړي : الف) د افغانستان د اړتیاوو د پوره کولو لپاره، هندوستان د هغه هېواد په لوړو تحصیلي موسسو کې ، دتحصیلي پروګرامونو د لا ودې او پراختيا لپاره ،د طب،انجنیرۍ او ادارې په څانګو کې ممکنې لارې ولټوي؛ او ب) دواړه خواوې به، په ښوونحيو او پوهنتونونو کې د محصیلنو د مبادلې پروګرام هڅوې او اسانوي. ۴- د هند هېواد به د افغانستان په حکومت کې، د ظرفیت جوړونې د ملاتړ په لړ کې د ملاتړ کې، لارې چارې لټوي او روزنیز تخنیکي تګلارې به برابروي ، او د افغانستان دحکومت په بېلابېلو برخو او له هغې ډلې نه به په اجرائیوې،قضایې او مقننې قواوو ،کې ظرفیت جوړونې ته دوام ورکړي. ۵- هند د افغانستان د اړتیاوو د پوره کیدو لپاره، په ملي او بهرني کچه،د حکومت او ادارۍ په برخه کې ،خپلې تجربې د ملي،ولایتي، ولسوالیو،محلي ادارو او دغه راز د د ملکي خدمتونو ،د دایمي او مسلکي سیستم د رامنځ ته کولو لپاره چې د افغانستان له شرایطو سره برابره وي،وړاندې کوي. ټولنيزې، فرهنګي ، مدني برخې او له خلکو سره د خلکو اړیکي ۱- د دواړو هېوادونو د خلکو ترمنځ د اوسنیو اړیکو د لا پراختيا د هلو ځلو په دوام، دواړه خواوې په پام کي لري چي، د پارلمانونو ، مطبوعاتو ،ښځو ، ځوانانو ، ورزشي برخو ، علمي ، فرهنګي، پوهانو او د مذهبي مخورو ترمنځ اړیکي لاپسې پیاوړې کړي. ۲- د افغانستان - هندوستان د ټولنې، له لارې ، هنرونو ، ادبياتو ، شعر او شاعري او داسي نورو فرهنګي برخو ته په پام سره به دټولنیزو او فرهنګي اړیکو د لا پراختيا لارې چارې ولټول شي او د يوبل له فرهنګي لاسته راوړنو او ميراثو سره به لاډيره پيژندګلوي پيداکړي. ۳- دواړه خواوي به د آزادو او خپلواکو مطبوعاتو په چوکاټ کې د دواړو هيوادونو د رسنیزو ټولنو ترمنځ د تبادلی زیاتوالی وهڅوي او پراختيا به ورکړي. ۴- دواړه خواوي به، د ښځو د پرمختګ ، او د هغو ددريځ،دهغو د تعليم او حقوقو او دغه راز په خپلو ټولنو کې د خوارو او کمزورو طبقو د ژوند د کچې د لوړولو په موخه کار وکړي. ۵- دواړه خواوې به، د دواړو هېوادونو د خلکو ترمنځ د قانوني تګ راتګ د لا هڅونې لپاره موافقه کوي چې د دواړو هېوادونو د اتباعو لپاره به د تګ راتګ قواعد او مقررات اسانوي، دواړه خواوې تکل لري چې: الف) دسيلانيانو د تګ راتګ او د دواړو هېوادونو د سيلانيانو د ټولنو ترمنځ همکاريوته وده ورکړی؛او ب) د دواړه هيوادونو د ښارونو ، ولايتونو او ایالاتو ترمنځ به د ملګرتوب د تړونونه لاسیکولو هڅه وشي. ۶- دواړه خواوې به ،هڅه وکړي ، دهغو کسانو لپاره چې دیو بل په هيواد کې له قضايی او حقوقي ستونزو سره مخامخ شوي دي، د متقابلو حقوقي همکاريو د موافقو له مخې په مدني او جزايی موضوعاتو کې مرسته وکړي. ۷- دمدنی ټولنو تر منځ اړیکو ته وده ورکول، په ځانګړي توگه د پوهانو د نظرونو د تبادلې دزمینی دبرابرولو لپاره، دواړه خواوې تکل لري چې د افغانستان-هندوستان ګردی میز چې په بېلابېلو برخو کی منل شوي استازي به پکې گدون ولري، جوړ کړي. ۸- دواړه خواوې موافقه کوي چی د ورزش په برخه کې به همکارۍ او تګ راتګ ته ودوه ورکړي. ۹ - دواړه خواوې موافقه کوي چی د ارزښتونو او د دموکراسي دټولنو په برخه کې د یو بل له تجربو نه چې د همکارۍ، د واک د ویش او تفویض ، او د قدرت لیږد ولو،د مرکز او ولایاتو /ايالاتونو ترمنځ داړیکو ، او د ټول ټاکنو دسیستمونو اصلاحات او نور په کې وي، زده کړی وکړی. او دا تجربې یو بل سره شریکې شي. ۱۰- دواړه خواوې موافقه کوي چی، د دواړه هیوادونو د پارلمانونو تر منځ د نظرونو د ګډوالی زمینه د پارلماني هیئتونو د تگ راتگ له لارې رامنځته او په دواړو هیوادونو کی د ی دپارلمانی ملګرتیا ډلې جوړې شي. د تړون د سرته رسولو څرنګوالی ۱- د استراتیژیکي همکارۍ دغه تړون ،دهمکارۍ د يوې شورا په چوکاټ کی چې، مشري به ئې د دواړو هیوادونو دبهرنیو چارو وزیران کوي،تر سره کیږي. دغه شورای به په کال کی یو ځل غوڼده کوي. ۲- دغه شورای به د بېلابېلو ، ګډو کاري ډلو لکه سیاسي او امنیتي مشورو، سوداگریز او اقتصادی همکارۍ، د ظرفیتونو د لوړتیا او تعلیم، ټولنیز، فرهنګي او د مدنی ټولنو نه جوړوي چې له اړونده وزارتونو او اداراتو نه به په هغه کې لوړ پوړي چارواکي ګډون ولري. ۳- د شوراي د رامنځ ته کیدو سره سم، د دواړو خواوو د خبرو اترو موجوده میکانیزمونه به هغې ته ورګډیږي. پایله د افغانستان اسلامي جمهوریت او د هند جمهوریت، د افغانستان دشاهي حکومت او دهند دهغه وخت د حکومت د ۱۳۲۸ لمریز کال د جدي د ۱۴ نېټې (چې د ۱۹۵۰ عیسوي کال د جنوري له ۴ سره برابره ده) د تړون پر یوه اساسي او تل پاتې ټکی چې وايي: “د دواړو حکومتونه ترمنځ تل پاتې سوله چې د دواړو هېوادونو د خلکو ترمنځ د زړه له کومې اړیکو د ساتلو او ودې لپاره به هڅه او هاند وکړي ،باید تحقق پیدا کړي” د بیا ټینګار له لارې، په دې همکارۍ کې پر مخ ځي. دغه تړون ،د ۱۳۹۰ لمریزکال ، د میزان پر ۱۳ نېټه ،چې ۲۰۱۱ عیسوي کال د اکتوبر له 4 نیټه سره برابره ده، په نوی ډهلی کې په دوو اصلی نقلونو کې( په هندي،، پښتو او انگلیسي ژبو) لاسلیک شو. د افغانستان د اسلامی جمهوریت جمهوررئیس د هند جمهوریت لومړی وزیر \|+\| لیکل سوی په واسطه دافغان ښوځوانانو ملي ټولنه در <-PostDate- \|

دافغانستان کرکټ په دوو لوبغاړو د لوبې بندیز ولګول شو

د افغانستان کرکټ په دوو لوبغاړو د لوبې بندیز ولګول شو

له ښۍ خوا: شفیق الله شفیق او شاهپور ځدراڼ

نصرت الله وفا- دافغانستان کرکټ ملي لوبډلې لوبغاړی شاپور ځدران د شپیږو میاشتو لپاره په نړیوالو لوبو او پر پخواني لوبغاړي شفیق الله شفق په نړیوالو لوبو کې د دوو کلونو او په کورنیو لوبو کې د یو کال لپاره د نه ګډون بندیز ولګید.

شاپور ځدراڼ په دې وروستیو کې د یوه رسمي سفر پرمهال د کرکټ له ټاکل شویو اصولو او قوانیو څخه د سر غړونې او د لوبډلې له نورو لوبغاړو سره د ناسم چلند له امله د شپږو میاشتو لپاره په نړیوالو سیالیو کې له ګډون څخه بې برخې شو.

همدا رانګه نوموړي ته د افغان چیتا لپه لوبډله کې د لوبیدو موکه ورکړل شوې وه وه خو نوموړي د افغانستان کرکټ بورډ دغه پریکړه ونه منله.

له دې سره سم د کرکټ ملي لوبډلې پخوانی لوبغاړی شفیق الله شفق هم د یوه رسمي سفر پرمهال د افغانستان کرکټ بورډ او د کرکټ نړیوالې شورا قوانین تر پښو لاندې کړل، نو له دې امله د افغانستان کرکټ بورډ پریکړه وکړه چې نوموړی به د دوو کلونو لپاره په نړیوالو او د یوه کال لپاره په کورنیو سیالیو کې نه لوبیږي .

دافغانستان کرکټ بورډ د دغه اقدام موخه د کرکټ لوبې ته پرمختګ او قوانیو ته احترام بولي ، تر څو تر دې وروسته نور لوبغاړي خپلو لوبو او په ځان دکرکټ د قوانیو پلي کیدو ته وهڅول شي.

د یادونې وړ ده چې دواړه لوبغاړي به تر ټاکلي مودې بندیز وروسته له فزیکې او تخنیکي اړخه تر څیړني لاندې نیول کیږي چې تر غوره پایلو وروسته به یوځل بیا د کرکټ په لوبو کې د لوبیدو موکه پیدا کړي

|+| لیکل سوی په واسطه دافغان ښوځوانانو ملي ټولنه در <-PostDate- |


	د نړۍ په هرو اووو کسانو کې یو کس موټرلري د نړۍ په هرو اووو کسانو کې یو کس موټرلري له وروستیو احصاییو سره سم، د تیر کال په اوړي کې په لومړي ځل د نړۍ د فعالو موټرو شمیر تر زر ملیونه واوښت. په دغو موټرو کې له لویو بسونو او لاریو رانیولې تر وړه کیو ګړندیو ګاډو پورې د موټرو ټول ډولونه شامل دي خو هغه موټر چې اوس نه چلیږي او بیخي خراب دي، نه دي حساب شوي. د رویټرز اژانس له راپور سره سم، د ۲۰۰۹ کال تر پایه پورې د نړۍ د موټرو شمیر نهه سوه اتیا میلیونو ته رسیدلی و او د دوه زره لسم کال تر اوړي پورې دغه شمیر تر یو میلیارد واوښت. رپورټ وایي چې نن سبا تر بل هر ځای په چین کې ډیر موټر پلورل کیږي او د موټرو د شمیر د زیاتیدو لویه وجه دا ده چې د چین د خلکو اقتصاد مخ په ښه کیدو دی. د اقتصادي چارو د شنونکو په نظر، د چین خلک به په راتلونکو کلونو کې د کال تر شل میلیونه ډیر موټر راونیسي او چې روانه میلادي لسیزه پای ته رسیږي دغه اندازه به څلویښت میلونو ته ورسي. په داسې حال کې چې په چین کې د موټرو شمیر مخ په زیاتیدو دی ، په امریکا کې یې شمیر تر ډیره حده ثابت پاتې دی. امریکایان یوازې د خپلو زړو موټرو ځای نویو ته ورکوی. که څه هم په چین کې د نړۍ تر بل هر ملک ډیر موټر خرڅیږي خو د چین د نفوسو په تناسب د چین خلک اوس هم تر لویدیځو هیوادونو ډیر کم موټر لري. د چین نفوس دیارلس سوه میلیونه دی او د دغه هیواد د ټولو موټرو شمیر اته اویا میلونه دی، یعنې په هرو اوولسو چینیانو باندې یو موټر رسیږي ، حال دا چې په ټوله دنیا کې په هرو اوو کسانو کې یو کس د موټر څښتن دی. \|+\| لیکل سوی په واسطه دافغان ښوځوانانو ملي ټولنه در <-PostDate- \|


	د بالیوډ کیسي له افغانستان سره مينه/ د بالیووډ کیسې/ محبوب خان له سلمان خان سره دخبرو پرمهال مې له هغه سره دافغانستان او پښتنو په اړه خبرې وكړې چې هغه خپل لنډ پيغام كې داسې وويل: ((زه په دې ښه پوهېږم چې په افغانستان كې مې ډېر زيات مينه وال شته چې زما فلمونه ګوري.ما د پښتنو د فرهنګ په اړه يو فلم كې كارهم كړى دى چې ( صنم بې وفا ) نومېږي. هر وخت چې هلته امنيت را شي نو زه به افغانستان ته دسيل لپاره ضرور راځم.)) له كيڼ لوري جي پي چوكسى محبوب او بيرج (داانځور دسلمان خان له خوا اخيستل شوى) له درده ډك سړى: سلمان خان دهندي سينما دوتلي ليكوال سليم خان په كوركې په ۱۹۶۵ كې د دسمبر پر ۲۷ نېټه سترګې پرانيستې او پلار يې پرې عبد الرشيد نوم كېښود.په ممبيي او ګواليار كې تر زده كړو وروسته يې په ۱۹۸۸ كې هندي فلمونو ته مخه كړه او په لومړي ځل په ( بيوي هو توايسې) فلم كې راڅرګند شوخو يو كال وروسته هغه د يو مخكښ ستوري په توګه(مين نې پيار كيا) كې وځليد او دهمدې فلم له لارې يې دفلم فيرد نوي فلمي لوبغاړي جايزه هم تر لاسه كړه.تر ۱۹۹۵ پورې سلمان خان تر لسو زياتو فلمونو كې د يو مخكښ ستوري په توګه رول ولوباوه چې( مين نې پيار كيون كيا )،( ساجن) او( كرن ارجون) تر نورو زيات وكتل شول.تر ۲۰۰۰ پورې هغه د نيمه كوميډي او رومانتيك هيرو په توګه په (بيوي نمبر ون) او(كوچ كوچ هوتاهې) كې وځليد.په ۲۰۰۳ كې چې دسلمان خان نامتو فلم ( تيري نام) نندارې ته وړاندې شو نو په ځوانه پوړۍ كې يې ډېر زيات مينه وال وموندل.خان د يوه نيمه كوميډي اواكشن هيرو په توګه تر ۲۰۱۰ پورې خپل برياليتوب ته دوام وركړاو په ( دبنګ ) فلم كې په راڅرګندېدلو سره يې د مټو زور ټولو ته وښود. دهغه زړورتيا او بې باكه انداز دومره په زړه پورې دى چې هر فلم يې دبرياليتوب پوړۍ ته رسيږي. د سلمان خان كورنۍ : سلمان خان دهندي سينما د وتلي ليكوال سليم خان زوىدى. دهغه مور سلما نومېږي او د ۱۹۷۰ كلونو وتلې ستورې ( هيلن ) يې ميره ده.سلمان خان دوه ورونه لري چې ارباز خان او سهيل خان نومېږي چې هغوى هم په فلمونو كې كار كوي.همدارنګه دوه خويندې هم لري چې الويرا او ارپتا نومېږي.سلمان د ۴۶ كلو دى خو واده يې نه دى كړى، اوس مهال په ممبيي كې د ګلكسي اپارتمان كې له خپلې ټولې كورنۍ سره يو ځاى ژوند كوي.دسلمان دپلار سليم خان په وينا دهغه نيكونه سل كاله وړاندې دپښتونخوا دسوات له سيمې نه د هندوستان اندور ته راغلي دي او دوى اخوزايي پښتانه دي. په فلمي نړۍ کې سلمان خان اغېز: سلمان د ډېرو دوستانو د درلودو له امله د باليووډ په فلمي ستورو باندې ډېر زيات اغېز لري. هغه هر وخت له ناداره خلكو سره مرسته كوي چې ددې لپاره يې يو مرستندويه بنسټ هم جوړ كړى دى.كله كله خوداسې هم شوي دي چې يو فلمي ستورى بې كاره شوى دى نو هغه ورته په خپل فلم كې رول وركړى دى.دسلمان خان زور هغه مهال خلكوته ورمالوم شو چې د يوې مرستندويه فيشن شو لپاره يې ۱۲ وتلې فلمي ستورې سره يو ځاى كړې او په ستېژ باندې يې دپيشكو تګ ته مجبوره كړې. رومانتيكه څېره: سلمان خان دباليووډ هغه وتلى ستورى دى چې اوس مهال په هندوستان اودسيمې په كچه په ځوانه پوړۍ كې تر ټولو زيات مينه وال لري.هغه كه هرڅومره د يوه رومانتيك او زړور فلمي ستوري په توګه پيژندل كېږي خو دهغه په هنر كې يوډول سادګي شته اود همدې ساده ګۍ له امله يې څو ورستيو فلمونو د ډېر كتونكو پام ورواړوه.سلمان خان اوس ۴۶ كلن دى خوكه له نېږدې يې وګورئ نو ۲۵ كلن ځوان به ښكاره شي. له همدې امله په ۲۰۰۴ كې د پيپل مجلې د نړۍ د اوم ۷ ښايسته سړي او په هندوستان كې داول جذاب سړي په توګه معرفي كړ. همدارنګه په ۲۰۰۷ دلندن يوه موزيم دهغه دمجسمې دايښودلو وړانديز هم وكړ.د سلمان خان رومانتيكې څهرې او بې باكه انداز په هندوستان د ډېرو نجونو زړونه وړي دي.سلمان خان تر اوسه واده نه دى خودهغه دمينې كيسې دهر چا په خوله دي. موږ هم پښتانه يو كرينه كپور له سلمان خان سره د فلمي صحنې د تمرين پر مهال ( دا انځور د محبوب له خوا اخيستل شوى) كرينه كپور د راندير كپور لور او د راج كپور لمسۍ ده،د راج كپور كورنۍ په ۱۹۲۰ كلونو كې د پېښور له قصه خوانۍ بازار د ډهكي نعلبندي څخه هندوستان ته وكوچېده او د هندي سينما په لومړيو كې ترټولو واكمنه كورنۍ وه.په كپور كورنۍ كې پريتوي راج كپور ( دراج كپور پلار)، راج كپور، شمي كپور، شيشي كپور،ريشي كپور( د راج كپور زوى) كرشمه كپور او كرينه كپور( دراندير كپورلوڼې)او رنبير كپور ( دريشي كپور زوى)په هندي سينما ډېر وځلېدل او اوس هم ورته ديوې پښتنې كورنۍ په څېر كتل كېږي. له همدې لامل و چې كله ښاغلي چوكسى زه هغې ته وروپيژندم او زما دپروژې په اړه يې ورته وويل نو هغې هم په زغرده وويل چې( مونږ هم پښتانه يو).كرينه كپور اوس مهال په باليووډ تر ټولو بوخته فلمي ستورې ده او په يو وخت كې له پينځو واړو خان ستورو سره رول لري. د پېښور په قصه خوانۍ كې د راج كپور د پخواني كور انځور چې له ۱۹۲۰نه تر اوسه په خپل حال پاتې دى. هنزيل كيچ يوه مينه ناكه ښاپېرۍ سلمان خان د هنزل كيچ او كرينه كپور تر منځ اغلې كېچ پخوا په هند كې په تاميلي فلمونو كې كار كاوه خو (باډي ګارد) يې له سلمان خان لومړنۍ هندي فلم دى د كرينه كپور د ټولګي والې رول په كې لوبوي.دفلم د شوټينګ پر مهال له كيچ سره هم اشنا شوم ،يوه صميمي نجلۍ راته وبرېښېده،په ښكلا كې له كرينه كپورنه كمه نه وه خوپه هندي فلمونو يوازې ښكلا مهمه نه ده او ښه بخت هم ورته پكار دى.تر ډېره وخته مې دباليووډ دفلمونو په اړه له هغې سره خبرې وكړې او دا مې هم ورته وويل چې د باډي ګارد په برياليوتوب سره به يې د بخت كړكۍ هم خلاصه شي. محبوب الله خان او هنزل كيچ \|+\| لیکل سوی په واسطه دافغان ښوځوانانو ملي ټولنه در <-PostDate- \|


	سریزه کله چې دامان الله خان پلار امير حبيب الله خان دلغمان په قلعه ګوش کې ووژل سو نو دهيواد سياسي واګې په کابل کې دعيدګاه په ورځ له يولړ سلا او مشورو ورسته دشاه امان الله خان غاړې ته ورواچول سوې چې ده هم دهيواد بد حالت ته په کتو سره تندی ورين ونيوه دخپلواکۍ غږ دده پلار حبيب الله خان هم پورته کړی و خو هغه په دې ونه توانيد چې له خپلو ځاني غوښتنو سره لاس او ګريوان و چې غازي امان الله خان مشر سو دخپلې ځانګړې ځانګړنې له مخې يې دهيواد له سپين ږيرو مشرانو ځوانانو سره په ګډه په کلکه ملا وتړله چې هيواد ته به په هر اړخيزه توګه خپلواکي ګټي ديو لړ توندو هڅو ورسته يې په کال ۱۲۸۹ لمريز دزمري دمياشتې په ۲۸ مه چې د۱۹۱۹ زيږديز کال داګست دمياشتې له ۱۸ مې نيټې سره سمون خوري دا په ثبوت ور سو له :چې غوټې پسې وهې په لاس به درسي چاويل چې په درياب کــــې ګوهر نسته له انګريز زبرځواکه دخپلواکۍ له اخيستلو وروسته يې دهيواد هر اړخيزې رغونې اوبيا رغونې ته پوره پام واړاوه چې په لمړي سر کې يې دافغانستان په تاريخ کې دهيوادلمړی اساسي قانون دافغانستان ددولت داساسي نظامنامې تر نامه لاندي په کال ۱۹۲۳ زيږديز داپريل په ۱۹ جوړ اوله لويې جرګې څخه ويست چې دا لومړی گام يې ددې ښکارندويي کوي چې هيواد يې دنړۍ دنوروپرمختللوهيوادونو په څير يو هيواد واوسي شاه امان الله ليونۍ مينه لرله چې دهيواد هر وګړی يې زده کړه وکړي او دنړۍ دنورو پرمخ تللو خلکو په څير يې ځلا ټول خلک وويني چې په دې لړ کې يې داروپا يو اوږد يون ته ملا وتړله تر څو له دې يونه اخيستنه وکړي او دهيواد دسوکالۍ په موخه يې په هيواد کې پلې کړي سفر يې وکړ ډير څه يې راوړل او پلي يې کړل خو له بده مرغه دانګريز دروزل سويو ملايانو له لاسه له ستونزوګاللو وروسته اړسو چې دواک واګې پريږدی. په درنښت اداره \|+\| لیکل سوی په واسطه دافغان ښوځوانانو ملي ټولنه در <-PostDate- \|


	په خرما سره ولی روزه ماتوو عبدالغفارجبیر که چيرې موږدخُرماوکیمیاوي تجزيې ته راسونودابه راته معلومه شي چې په خُرماکې معدني مواد، پروتینونه، ګلوکوز، اوسپنه، ویتامینونه اوداسي نورډېرموادشته ، چې دانسان ورته اړتیاډیره ده، لکه مخکې چې بیان شول؛ دپورتنیوموادوپه درلودلوسره ویلای شوچې خُرمایوه مکلمه غذاده ۔ کله چې موږپه خُرماروژه ماتوو، دخُرماخوږه دخولې دمخاطي غشاء (Mucous Membrane) لخواجذبیږي اوپه ګلوکوزسره بدلیږي، چې پایلې يې دادي چې دبدن ټوله ضایع شوې انرژې پخپل حالت کې راولي؛ وبل لورته خُرمادمعدې تيزاب ایچ سي ایل (Hydrochloric Acid) نه زیاتوي بلکې هغه کنترولوي اووبل لورته معده نه پرېږدي چې بخاروکي؛ په عمومي ډول سره خُرمادمعدې ټول رطوبات متوازن ساتي اوپوره تقویه ورکوي۔ دحمل په دوران کي دخُرماخوړول اړین دي دحضرت بی بی مریمې رضی الله عنها په نس کې سیدناحضرت عیسی علیه السلام ؤنوالله جل جلاله دخُرمادخوړولوامرورته وکړ، چې ته به دلته ښه تازه خُرماخورې، چې مطلب يې دادی چې خُرماستالپاره یوه مکمله غذا (Nutrition)اودرمل دي اوخُرمادموراوماشوم دواړولپاره په دې اړینه ده چې دوی دواړه قوی اوتندرست ساتي، که چيرې موراوماشوم کمزوري وي نوداسقاط حمل (Abortion) خطره رامینځته کیږي، خودخُرماپه خوړولوسره داهرڅه له مینځه ځي۔ دالمان دبرلین دپوهنتون دفارمالوجي ډاکټرانوپرخُرماباندې ډېرې څيړنې وکړلې، چي په پایلوکي يې وویل چې که چيرې حامله ښځې هره ورځ خُرماوخوري، اغیزې به يې ډېرې مثبتې وي، اودااغیزې په ټول بدن باندې غوړیږي؛ اوددې سره ـ سره ښځې ته پوره توان ورکوي، ماشوم يې قوي کوي، هغه ښځې چې دحمل په جریان کې خُرماوخوري دحمل پروخت يې دټولوناخوالودرمل ده اودماشوم دپیدایښت پرمهال به هیڅ تکلیف ونلري۔ (Science and World)دحامله ښځې لپاره خُرماپه دې اړینه ده چې خُرمااوسپنه لري، اوداسې ښځوته ډاکترانو په عمومي ډول سره فیفول ویټ اویاهم فولک اسید اونوردرمل ورکوي داځکه چې په دې درملوکې اوسپنه اونورویټامینونه شتون لري چې خُرماددې ټولوڅخه غوره اوښه ده، داځکه چې په خُرماکې ددې درمل څخه ډېرشیان شتون لري اوبله داچې داطبعي ده۔ یوه ميرمن چې دماشوم دپیداکيدوپرمهال دتل لپاره په تکلیف اوپريشانیوکې ډوبه وه، روغتیاپالانوورته دماشوم ترپیداکيدوپورې دخُرمادخوړولوتوصیه وکړل، دې ميرمنې دډاکترانودانسخه عملي کړه اودماشوم دپیداکيدوپرمهال يې هیڅ تکلیف اوکړاوونه لید؛ اوداهوډ يې وکړچې دتل لپاره به دحمل په دوران کې خُرمااستعمالوي اونوروخویندوته به هم داتوصیه په ټینګه کوي چې دخُرماخوړل دحمل په دوران کې ډېراړین دي۔ خُرمادښځو دډېروناروغیولپاره پوره درمل دي، که چيرې یوه ښځه درحم دکمزورۍ سره لاس اوګرېوان وي، په داسې حالت ترلندې خُرماورته وچه خُرماډېره ګتوره اوشفاء ده؛ دخُرماخوړل درحم دهرډول ناروغیولپاره پوره کیمیاده، دحمل په دوران کې که هرڅه تکلیفونه اودردونه پیداکیږي دهغوټولولپاره خُرماپوره درمل ده۔ \|+\| لیکل سوی په واسطه دافغان ښوځوانانو ملي ټولنه در <-PostDate- \|


	دبیخوبی اغیزی څه دی داکتراشرف نادری نويو څیړنو ښودلې ده چې لږ خوب کول د نارینه وواو ښځینه وو په بدن کې یو لړ بدلونونه مېنځته راولي چې ددې جملې څخه د نارینه وو په وجود کې د ټیسټوسټیرون Testosterone پرکچه باندې منفي اغیزې کوي یعنې ددې هورمون کچه کموي .ددې څیړنو ماهرانو دا هم ویلي چې د خوب کموالی په ځانګړي توګه د منځني عمر نارینه وو پر روغتیا باندې بدې اغیزې شیندلای سي . په شپه اوورځ کې اوه الی اته ساعته خوب او استراحت نه یوازې د انسانانو د ورځني حالت او روغتیا د پاره اړین دی بلکې دااصل د دوی دجنسي وړتیا اوقوت د پاره هم ضرور او ګټور ګڼل سوی دی . د شیکاګو په پوهنتون کې د یوشمیر ماهرانو څیړنو د خوب کولو او تیستوستیرون د کچې تر منځ نیغې اړیکې په ګوته کړې دي ، نوموړې څیړنه پر ۱۰ تنو ځلمیانو باندې ترسره سوې ده . دې ځلمیانو ته یې پرله پسې اته شپې ورځي داسی شرایط برابر کړي وه چې باید تر پنځه ساعته یې هم لږ خوب کړی وای ، په نهمه شپه اوورځ کې یې چې کله ولیدل ، د نوموړو کسانو په بدن کې د ټیسټوسټیرون کچه په سلو کې د ۱۰ څخه تر ۱۵سلنه پوري را ټیټه سوې وه ټیسټوسټیرون څه شى دي؟: دا هغه نارینه ای جنسي هورمونونه دي چې د دوی د مقاربتي ځانګړتیاوو په څرنګوالي او انکشاف کې بنسټیز رول لوبوي . هغه هورمونونه چې د نارینه وو د بیضو څخه ترشح کیږي ، دوی دعضلاتو په تقویه ، جنسي فعالیت ، د هډوکانو په کلکیدو ، غوړین قشر او د ویښتانو په رشد کې د پام وړ اغیزې لري. د یوه روغتون سرطبیب او په جنسي چارو کې پروفیسر ښاغلي E. Skakkebek وایي چې د اوږدې مودې د پاره د خوب کموالی یا بې خوبي د نارینه وو دجنسي يا نرښت توان د پاره ناوړې پایلې لري . دا ځکه چې دا کار د جنسي هورمونو د تولید او ترشح کچه را ټیټوي . د نارینه وو بیضې هغه وخت د ټیسټوسټیرون ماده تولیدوي ، کله چې دوی په مغز کې د LH په نامه دیوه هورمون لخوا تحریک سي . خوب او کمخوبي بیا ددې مادې د تولیدولو پرکچه باندی زیات اغیز لري . نوموړى پروفیسر زیاتوي چې د نوو ځلمیانو د بلوغ دپیل په پړاو کې ددغې مادې د تولید زیاتوالی یوازي د شپې لخوا تر سره کیږي . یو ولادي ډاکتر Svend Lindenberg وایي : د منځني عمر نارینه په ځانګړي ډول پدې اړوند د خطر په زون کی ځای لري . دی زیاتوي « ځوان نارینه پدې اړوند ډیر تر خطر لاندې نه دي ، ځکه چې په دوی کې ددې موادو د تولیداوپرمختیا کچه جګه ده . د خوب متخصص Jan Ovesen وایي : « خوب یوه کومپلکس یا ګډه پدیده ده چې د انسان د بدن ډیر فعالیتونه ور پورې تړاو لري ». د نوموړو څیړنو څخه دا پایله تر لاسه کیږي چې باید خوب او استراحت ته ډیره پاملرنه وشي . د څیړنې پای د لیکونکي ډاکتر یادوونه : بې خوبي نه یوازې د نارینه وو او ښځینه وو په یوه سیستم یا یوه ځانګړی غړي باندې تاثیر شیندي بلکې دډیرې بې خوبى له امله دماغ، حوصله، حافظه، تحمل، او هم د جسم عضلات چې په فزیکي فعالیت کې برخه اخیستونکي غړي، ورځنۍ کړنې، روحي آرامتیا، جنسي وړتیا، دید، او حتی دانسان ټول وجود ددې اغیزڅخه بې غمه نه دي، پرله پسې بې خوبي کیدلای سي په یوه شخص کی دوامداره ناروغي منځته راوړي چې دا ناروغي په خپل وارسره ډیرې خطرناکې پایلې لرلای سې چې ددې خطرناکو پایلو له جملې څخه یوه هم د زړه یا ماغزو په رګونو کې د ترسب یا منګ نیولو دپروسې چټکتيا. دا هغه څه دي چې دزړه یا مغزد دریدو ( سکتې کولو ) لامل ګرځي او ډیر وختونه مرګوني پایله لري . له دې نه پرته دوامداره بیخوبي په بدن کې د اینسولین ماده چې په وینو کې دخوږې یا شکرې د کچې په کنټرول کې برخه اخلي او هم د شکرې د لوړوالي د مخنیوي دنده پر غاړه لري ،بد خوبي دا د انسولین وظایف اغیزمنوي او په دې توګه انسان د شکرې د ناروغۍ ( معمولا دویم ټایپ ) باندې اخته کولای سي . په غیر طبعي ډول چاغیدل ، خلق تنګي او دیپريشن،خفګان او یو زیات شمير نورې جسمي او روحي ناروغۍ هم د بیخوبۍ له امله وده کولای سۍ . لنډه داچې بیخوبي د انسان د ورځنيو کړنو پر ټولو اړخونومنفي اغیز ښندلای شي. دیوه انسان د پاره خوب په شپه او ورځ کې په منځني ډول ۷ – ۸ ساعته خوب کافي ګڼل شوی چې ماشومان او نوي ځوانان باید له دې زیات ویده شي او دپاخه عمر لرونکي کسان کولای سي له دې کچې نه هم په لږ خوب ګذاره وکړي . د بیخوبۍ څخه د اړوندو تابلیتونو په مټ مخنیوی کول ، دا هغه اخیرنۍ چاره ده چې ورڅخه کار اخیستل کیدلای شي . ښه داده چې بیله دې نه نورې لارې په کار واچول سي لکه ورزش ، قدم وهل ، د خوب نه مخکې په ډکه ګیډه غذا نه خوړل ، د بیدیدو سره سم د ژوند خوږې او په زړه پورې خاطرې رایادول او په هکله یې چرت وهل ، د خوب په بستر کې د ترخو خاطرو نه یادول او په باره کې یې فکر نه کول ، د خوب د اطاق هوا تازه ساتل او د تودوخي درجه یې د ۱۷ – ۱۸ درجو څخه نه جګول ، په ارامۍ سره اوږد او ژور تنفس کول، دبستر اوطاق تریوې اندازې پوري تاریکول . . . . ..‏اوداسي نور . ګران لوستونکي کولای سي د عقلي عصبي متخصصینو او هم د اړوندو ماهرانو څخه داسې ګټورې مشورې تر لاسه کړی، چی ددې مشورو په اجرآ سره بیله دې چې ټابلیتونه اونوردرمل استعمال سي انسان په ارامه سره خوب و کولای سي ، خو له هر څه نه زیات باید پخپله پر ځان باندې کار وشي او ارامتیا ته خپله ځان تلقین کړى. ـ دلایزال څښتن څخه درته دخیرشپې آرام او ژور خوب غواړم! \|+\| لیکل سوی په واسطه دافغان ښوځوانانو ملي ټولنه در <-PostDate- \|


	هلمند رخام دبره پاکستان غلاکوی په هلمندكې د رخام ډبرې پاکستان ته په قاچاق ډول وړل كيږي . دسيمې اوسيدونكي وايي چې ګاونډي هيوادونه په ځانګړي ډول پاكستان درخام ډبرې پخپل سرپه غيرقانوني ډول وړي دهلمند دحجاری اونجاری فابريکې ريس تاج محمد دامني چې څه موده وړاندې دپاکستاني قاچاقبرانو له لوري وړل کېدې خواوس يې مخه نيول سوې . دخانشين ولسوالۍ اوسيدونكي وايي چې دوی له ګاونډيوهيوادونوڅخه ځينې كسان ويني چې هره ورځ لسګونه موټرونه درخام له ډبرو ډك پاكستان اونورو هيوادونوته په ناقانونه توگه وړي . دوی وايي په هغه سيمه كې چې دغه كان دی هلته دولت حاكميت نه لري . ددوی په خبره كه يې دقاچاق مخه ونه نيول سي ليرې به نه وي چې ټول كان به يوه ورځ له منځه تللی وي . دوی وايي چې چارواكوته يې څوڅوځلې خبروركړى خوهغوى تردې مهاله كوم مثبت ځواب نه دی وركړی. دخانشين ولسوالى اوسيدونکی عبدالغني وايي ((په سترګويې ليدلي چې له ګاونډي هيواد پاکستان څخه موټرونه راځي او دډبروڅخه يې دډکولو وروسته بيرته پاکستان ته وړي دی وايي که ددې ډبرودقاچاق مخه دي ونيول سې او په افغانستان کې دي ورته فابريکې جوړې سي له يوې خوابه يې له کانونو څخه ګټه اخستې وي او له بلې خوابه يې ځوانانو ته دکار زمينه برابره کړي وي )) په لښكرګاه كې دحجارۍ اونجارۍ فابريكې مشرتاج محمدوايي ((چې پاكستان ددغه كان په وړلوكې ځانګړي خلك روزلې چې ډيرى دسيمي بلوڅ اوسيدونكي دي . دی وايي: چې تردې وړاندې هره ورځ لسګونه ټنه ډبره وړل كيده خوپه دې وروستيوكې دهلمند والي په هدايت دايساف ځواکونودهوايي ځواک په مرسته توانيدلي چې ترډيره بريده درخام ډبرې دقاچاق مخه ونيسي .)) دده په ويناچې دوی په لښكرګاه كې درخام دډبرولپاره فابريکه لري چې ورڅخه بيلابيل لوښي اونور توکي جوړوي . ۳ پاڼه \|+\| لیکل سوی په واسطه دافغان ښوځوانانو ملي ټولنه در <-PostDate- \|